Hondarribiak Kontxako Banderarako sailkatzea lortu du

ARRAUNA

Eguraldi eta itsaso txarrak erabat baldintzatu zuen atzo Kontxako Banderako sailkapen estropada. Ezustekoetarako aproposa izaten den testuinguru horretan Hondarribiak ez zuen huts egin, eta hirugarren postuan gelditu zen Kaikuren eta Urdaibairen atzetik. Chapelako treineru galiziarra izan zen eguneko ustekaberik handiena, seigarren postua lortu eta San Miguel Ligako taldeak kanpoan uztea lortu zuen eta. Igandean izango da Kontxako Banderako lehenengo jardunaldia eta bertan izango da Hondarribia Arraun Elkartea. Lehenengo txandan egingo dute arraun Ama Guadalupekoako mutilek, Kaiku fabotiro handiaren, Chapela ezustekoaren eta Astilleroren ondoan. Orain arte ikusitakoaren arabera, sestaotarrak dira indartsuenak, baina hondarribiarrek ere denboraldia modurik onenean borobildu nahiko dute. Eta eman duten mailarik onena berdintzea lortzen badute, ez dira oso urrun izango.

                        Ama Guadalupekoa, olatuen kontra borrokan.

Denboraldiko lehenengo puntua lortu du Real Unionek

FUTBOLA

CD IZARRA 2-2 REAL UNION CLUB

REAL UNION CLUB: Otermin, Gabarain, Herreros, Valín, Piette, Moscardó, Albistegi, Chuchi, Angulo (Seguro, 85.min), Juan Dominguez (Lambarri, 65.min) eta Colinas.

Markagailuan bi bider atzetik izan ondoren, emaitzari buelta eman eta bina berdintzea lortu du Real Unionek Lizarran. Belar artifizialeko zelaiak eta epailearen erabakiek markatu dute Izarraren eta txuribeltzen artekoa. 15. minutuan jarri dira aurretik nafarrak eta 36.ean banakoa lortu du Juan Dominguezek. Atsedenalditik bueltan 2 eta 1ekoa jarri du Izarrak 53.minutuan, baina 69.ean, ia zelaira irten bezain pronto amaierako binakoa sartu du Ander Lambarrik. Lehenengo jardunaldia bukatzeko partida bat falta dela, sailkapeneko bosgarren postuan dago Real Union, puntu batekin. Datorren igandean Barakaldo hartuko du Stadium Galen, arratsaldeko seiretan.

                             Denboraldiko lehenengo hamaikakoan izan da Samu Piette.

Lizarran abiatuko da Idiakezen Real Union

FUTBOLA

Aurredenboraldiko froga, entsegu eta entrenamendu gogorrak amaitu dira eta 2012-2013 denboraldiari hasiera emango dio gaur Real Unionek. Aurreko urteko porrotaren ondoren, guztiz eraberrituta eta ilusioz gainezka dator talde txuribeltza. Imanol Idiakezek gidatzen duen Real Union berriak denetariko emaitzak lortu ditu uda honetan baina gaurtik aurrera argitzen hasiko da txuribeltzen aurtengo helburua. Lizarran jokatuko dute gaur, arratsaldeko seiretan, hirugarren mailatik igo berria den Izarraren kontra. Tranpa arriskutsua izan daiteke ezaugarri hori, kontuan hartu behar baita nafarra talde osatua dela eta Unionek denbora beharko duela oraindik. Multzoko belar artifizialeko zelai bakarra da gainera Lizarrako Merkatondoa. Oso talde lehiakorra izan beharko du beraz Real Unionek ligako lehenengo hiru puntuak Irunera ekarri eta hasieratik sailkapeneko lehenengo postuetan borrokatu nahi badu. Imanol Idiakezen ligako lehenengo hamaikakoa ondorengoa izan daiteke: Otermin, Gabarain, Valín, Herreros, Kijera, Moscardó, Albistegi, Colinas, Chuchi, Angulo eta Juan Dominguez.

                           Ligari hasiera emateko prest dago aurtengo Real Union.

Denboraldiko azken hilabeteari ekingo dio Hondarribiak

ARRAUNA

Zarauzko Banderako porrotaren ondoren, Hondarribiak ez du San Miguel Liga irabaziko, Kaikuren hondamendia gertatzen ez bada behintzat. Baina helburu garrantzitsuak gelditzen dira oraindik falta den hilabete honetan. Asteburuan Castron eta Portugaleten izango dira estropadak eta datorren ostegunean, Kontxako Banderako sailkapena egongo da jokoan. Zazpi traineru onenen artean egon beharko du Hondarribiak, Donostiarra zuzenean sartzen baita. Denboraldian zehar ikusitakoaren arabera, Ama Guadalupekoak ez luke sailkatzeko arazorik izan beharko, baina ez da lan erraza izango. Kontxaren ondoren San Miguel Ligako beste bi Bandera egongo dira jokoan, baina sailkapeneko lehenengo postutik urrun, Donostiakoa izango da Mikel Orbañanosen mutilen helburu nagusi.

                       2005ean lortutako balentria errepikatu nahi du Hondarribiak.

Jon Villanueva izango da Real Unioneko bigarren atezaina

Jon Villanueva bizkaitarra Real Unioneko atezain izango da. Barakaldon jaiotako 22 urteko jokalaria da eta Real Valladolidek utzita dator Irunera. Athleticen harrobian hasi zen futbolean, Bilbao Athleticera iritsi arte. Pasa den denboraldian Lezama utzi eta Valladolid aldera irten zen. Real Unionek Xabier Otermin besterik ez zeukan atea defendatzeko eta Villanuevarekin postu hori osatzen du. Iñigo Echepare irundarrak beraz filialean jokatzen jarraituko du, aurredenboraldi ona egin duen arren. Gaur arratsaldeko entrenamenduan bertan estreinatuko da Galen Barakaldoko atezaina.

Lehenengo taldeko hamar jokalarirekin hasiko du Bidasoak aurredenboraldia

ESKUBALOIA

C.D. Bidasoak aurredenboraldiari hasiera emango  gaur Artalekun (19.30). Fernando Bolea entrenatzaile berriak gidatuko duen lehenengo entrenamendua izango da eta taldea, hasiera batean espero zitekeena baino txikiagoa. Badirudi Fernando Rinconek eta Paco Barthek ikasketak direla eta taldea utziko dutela. Cambronero anaiek jarraituko duten ere, ez dago batere argi. Ikerrek ez du Bidasoarekin akordioa lortu eta Artalekutik kanpo dago bere etorkizuna. Elur anaia gaztea ere ez dago ados klubak eskaini dionarekin. Bidasoarekin entrenatu eta Irungo Gaztiak taldearekin jokatzea hain zuzen ere. Azkenik, Marc Astydamas atezainak ere taldea utziko du, Pauen, Frantzian, jokatzeko. Hiru jokalari berri ere iritsi dira: Alberto Mouriño atezaina, Ander Ugarte pibota eta Joel Moreno kubatarra. Ander Martin, Javier Zamarreño eta Iñaki Cavero jubenilek ere, lehenengo taldearekin egingo dute lan, aurredenboraldian behintzat. Lagunarteko partidei dagokienez bi konfirmatu ditu klubak oraingoz. Abuztuaren 30ean Egiaren kontra jokatuko dute horiek etxetik kanpo eta irailaren 1ean Artalekun Billereren aurka.

                       Uda luzearen ondoren, hutsik egoteari utziko dio Artalekuk.

Atzera pausoa eman du Hondarribiak ligari begira

ARRAUNA

Larunbatean Kaikurekiko denbora asko galdu bazuen, gaur guztiz hondoratu egin da Ama Guadalupekoa. Zarauzko Banderako bigarren jardunaldian sestaotarrengandik oso urrun izan da Hondarribia eta ohorezko txandako azken postuan gelditzea gutxi izango balitz, beste bost traineruk ere berdeek baino denbora hobea egin dute. Bederatzigarren postuan gelditu da Hondarribia, denboraldi osoko estropada okerrenetariko batean. San Miguel Ligako sailkapen nagusian ere, abantaila handia hartu du Kaikuk. 153 puntu dituzte bizkaitarrek, Hondarribiak baino hamaika gehiago. Kaikuren lehiakortasuna ikusita, zail izango dute bidasoarrek desabantaila hori gainditzea.

Aurredenboraldiari amaiera eman dio Real Unionek

FUTBOLA

Atzo Stadium Galen Athletic Bren kontra jokatutako partidarekin aurredenboraldia bukatutzat ematen du Real Unionek. 0 eta 2 galdu zuten txuribeltzek, gehiago merezi izan zuten arren. Aurredenboraldi osoan zehar ere emaitzak ez dira oso onak izan, baina garrantzitsuena taldeak eman zuen itxura da. Defentsan arazoren bat edo beste izan du, baina orokorrean nahiko sendo agertu da eta kalitatezko joko zipriztinak ere ikusi ahal izan dira. Gaurtik aurrera ligako lehenengo jardunaldia prestatzeko aste bat dauka Imanol Idiakezek. Izarra bisitatuko du Real Unionek Lizarran, igandean, arratsaldeko seiretan. Bitartean taldeari falta zaizkion aurrelariaren eta erdilariaren bila jarraitzen du Iñaki Berruet idazkari teknikoak. Azken hori Mikel Alonso izan daiteke, azken bi partidetan elastiko txuribeltzarekin ikusi ahal izan dugu eta. 

                     Atzo Idiakezek zelairatutako hamaikakoa (realunionclub.com).

San Miguel Liga erabakitzen hasiko da gaur

ARRAUNA

35 graduko bero ikaragarriarekin ospatuko da gaur Zarauzko Banderako lehenengo jardunaldia. Arratsaldeko seirak eta laurdenetan emango zaio irteera lehenengo txandari, eta hirugarrenean, ohorezkoan, Hondarribiko Ama Guadalupekoa ontzia izango da, Kaikurekin batera Liga irabazteko lehia bizian. Bi puntuko aldea besterik ez dute sestaotarrek, baina azkeneko estropada irabazi zuten Zumaian. Hondarribiak Espainiako Txapelketa irabazi zuen duela bi aste eta etxeko estropada, Hondarribikoa, pasa den larunbatean. Asteburu honetan, izen handia duen Bandera jokoan egoteaz gain, San Miguel Ligako sailkapen nagusia ere Nerbioi edo Bidasoa aldera begira jarri daiteke.

                       Mikel Orbañanos, Ama Guadalupekoaren buruan.

Berdinketa Real Unionen eta Real Sociedad Bren arteko partidan

FUTBOLA

Bina berdindu zuen atzo Real Unionek Zarautzen, Real Sociedad Bren kontra. Aurredenboraldiko azken aurreko partida izan zen Astiko zelaian jokatutakoa eta ohi baino aldaketa gutxiago egin zituen Imanol Idiakezek, ligaren hasierari begira. Deigarriena Mikel Alonso berdegunean ikustea izan zen. Tolosarrak Real Unionekin entrenatzen jarraitzen du baina bere etorkizunaren inguruko albisterik ez da iritsi oraindik. Atzo lehenengo partida jokatu zuen eta zelai erdiaren jabe izan zen, defentsan lagunduz, baloiak berreskuratuz eta pase luze ederrak emanez. Sanse jarri zen aurretik markagailuan, Kenan Kodrok sartutako penalti jaurtiketari esker. 38. minutuan Juanan Segurok berdintzea lortu zuen, Colinasen pasea maisuki errematatuz. Bigarren zatiaren erdian Realak talde guztia aldatu ondoren Real Unionek 2 eta 1 ekoa sartu zuen. Angulo izan zen golegile berriro ere. Baina hurrengo jokaldian bertan amaierako binakoa lortu zuen Sanseko Rodriguezek. Ondorengoa izan zen Idiakezek zelairatutako taldea: Otermin, Gabarain, Valín, Vázquez, Kijera, Alonso, Albistegui, Colinas, Dominguez, Seguro eta Lambarri. Bigarren zatian Vizcaíno, Arzamendi, Piette, Moscardó, Chuchi, Infante eta Angulo sartu zituen. Larunbatean azken lagunartekoa jokatuko du Real Unionek Galen, Athletic Bren kontra (19.00).

                           Ligaren hasierara ondo iritsi nahi du Imanol Idiakezek.

Maila handiko txirrindularitza izango da gaur Donostiako Klasikoan

TXIRRINDULARITZA

32. Donostia Klasikoa Behe Bidasoako esualdetik pasako da gaur. Lasterketako puntu garrantzitsuenetakoa Jaizkibel izango da eta bi aldiz igo beharko dute txirrindulariek. Hirurak aldera pasako dira lehenengo aldiz, eta laurak aldera bigarrenez. Ondoren Hondarribitik eta Irundik ere igaroko dira (Letxunborro Ibilbidea). Aurten gainera, Juanma Garate irundarra, eskualdeko ordezkaria, irteeran izango da. Rabobank taldeko txirrindularia Espainiako Vuelta prestatzen aritu da, baina ikusi behar nola moldatzen den Donostiakoa bezalako egun bakarreko lasterketa batean. Ondo ezagutzen duen ibilbidea eta zaleak alde izango ditu, baina oso maila handiko lehiakideak izango ditu parean. “Purito” Rodriguez, Luis León Sánchez, Alejandro Valverde, Sylvain Chavanel eta Alexander Vinokurov izango dira Klasikoa irabazteko faboritoetako batzuk.

                         Juanma Garate izango da eskualdeko ordezkaria Klasikoan.

Hondarribiko Bandera etxean gelditu da

Espainiako Txapelketan emandako kolpearen ondoren, denboraldiko hitzordu garrantzitsuenetakoan ere inor baino azkarrago aritu zen Ama Guadalupekoa. Milaka zaleren aurrean, “XV. Hondarribiko Bandera” irabazi zuten berdeek larunbatean, San Miguel Ligako sailkapen nagusian ere aurrera pauso handia emanez. Kaiku liderrarengandik puntu bakarrera gelditu zen Hondarribia. Izan ere, estropada eremu bidasoarrean bosgarren postuan gelditu ziren sestaotarrak, Hondarribiarengandik 21 segundura. Igandean ordea bizkaitarrak izan ziren lehenengoak, Zumaian. Orbañanosen mutilak bigarren postuan gelditu ziren eta taineru berdeen arteko aldea bi puntukoa da orain.

                       Traineruko mutilak eta Hondarribiko Bandera.

Arraun asteburua Hondarribian

ARRAUNA

Hiru estropada izango dira asteburu honetan Hondarribian, Arraun Elkarteak antolatuta.  Atzetik aurrera hasita, bihar goizean “Arrantzaleen Kofradiako VI. Bandera” ospatuko da, ARC-1 ligako promozioko estropada (11.30). Hondarribia B izango da bertan, liga bigarren maila horretan jarraitzeko borrokan. Gaur bi estropada izango dira. Lehenengoa Gipuzkoako Emakumezkoen Ligako “VII. Txingudiko Bandera”. Eta ordu laurden beranduago asteburuko froga nagusia, “XXV. Hondarribiko Bandera-Mapfre Sari Nagusia”. Bertan izango da Ama Guadalupekoa, ohorezko txandan, 2006tik irabazi ez duen bandera lortzeko prest. Denboraldi honetan berdeek erakutsi duten maila kontuan izanda, ez dira urruti izango. Estropada eremua ondo ezagutzen dute, eta zaleen animoak gainean edukiko dituzte gainera. Egun handia izan daiteke gaur Hondarribiarentzat.

Eskualdeko Olinpikoek haien parte hartzea amaitu dute

JOKO OLINPIKOAK

Joko Olinpikoak ez dira bukatu, baina bai gure eskualdeko kirolarien parte hartzea horietan. Horrekin batera, haren balorazioa egitea tokatzen da.  Ander Elosegiren diploma olinpikoa izan da gure ordezkarien lorpenik handiena. 2008an Beijingen lortutako laugarren postua errepikatu du Anderrek, ur bizietako C1 modalitateko finalean. Jaitsiera ona egin zuen, garbia eta penalizaziorik gabea. Brontzetik 3.7 segundura gelditu zen bakarrik. Juanjo Aramburu tiratzaileak domina lortzeko intxaropen handia zuen baina Londresen ez zen ondo moldatu eta 23. postuan gelditu zen, finaletik oso urrun. Dominak ondo ezagutzen dituena Iker Martínez hondarribiarra da, Xabi Fernandezekin batera belan urrezko eta zilarrezko domina lortutakoa baita. Baina oraingoan, 49erreko finaletik kanpo gelditu dira. “Volvo Ocean Race” estropada ozeanikotik iritsi berriak ziren, eta entrenamendu falta nabaritu zaie. Hamabigarren postuarekin konformatu behar izan dute. Julen Aginagalde irundarra izan da Joko Olinpikoetan bukatzen azkena. Asteazkenean final erdietatik kanpo gelditu zen Espainiako eskulaboi selekzioa. Frantziaren kontra galdu zuen Espainiak 22 eta 23, lehenengo zati osoan zehar markagailuan aurretik izan ondoren. Bost golekin, Julen Aginagalde izan zen Espainiaren erreferentzia nagusi erasoan.

Julen eta Ander, Bidasoaldeko ordezkari onenak.

Bina berdindu du Real Unionek Gasteizen

FUTBOLA

Aurredenboraldiko hirugarren berdinketa lortu zuen atzo Real Unionek Gasteizen, Alaves Bren kontra. Ibaiako kirol instalazioetan izan zen beroak markatutako lagunarteko partida. Txuribeltzek estreinatu zuten markagailua, seigarren minutuan Mario Capelete jubenilak sartutako golari esker. Bigarren zatian gasteiztarrek berdintzea eta aurretik jartzea lortu zuten baina 78. minutuan Juan Dominguezek binakoa jarri zuen markagailuan, Colinasen pasea errematatu ondoren. Aurredenboraldi osoan zehar bezala, Imanol Idiakezek prest zeuden jokalari guztiak zelairatu zituen partidan zehar. Etxepare, Sagredo, Vizcaíno, Arzamendi, Gabarain, Valín, Albistegi, Capelete, Seguro, Infante eta Lambarri aritu ziren lehenengo zatian. Bigarrenean Otermin, Piette, Kijera, Moscardó, Chuchi, Angulo, Colinas eta Juan Dominguez sartu ziren.

                          Bi gol daramatza Juan Dominguezek aurredenboraldi honetan.

Iñaki Salaberria eta Lara Bicandi izan dira azkarrenak Zeharkaldian

IGERIKETA

Bederatzigarren edizioa izan du asteburu honetan Bidasoa XXIek antolatzen duen Txingudiko Itsas Zeharkaldiak. Eguraldi ezin hobea izan zuten 315 parte-hartzaileek.  Hondarribiko Butron pasealekutik irten ziren eta 2.600 metroko ibilbidea osatu behar izan zuten hondartzan amaitzeko. Iñaki Salaberriak irabazi zuen gizonezkoetan, Alvaro Oyarbideren eta Jaime Caballeroren aurretik. Emakumezkoetan Lara Bicandi izan zen azkarrena. Garazi Uribarri gelditu zen bigarren postuan eta Ane Vega hirugarrenean.

Kaiku gainditu eta Espainiako Txapelketa irabazi du Hondarribiak

ARRAUNA

Kaikuren nagusitasuna apurtu du gaur Hondarribiak Castroko estropada eremuan. Inoiz irabazi gabeko Espainiako Txapelketa eskuratu dute berdeek, atzetik aurrerako lan ikaragarriaren ondoren. Ziztu bizian atera da Kaiku, eta lehenengo luzean bost segunduko aldea ere izan du. Baina lehenengo ziabogarako Hondarribiak bi segundura murriztu du sestaotarren abantaila eta ordutik aurrera Ama Guadalupekoak hartu du estropadaren burua. Bere arraunketa garbi eta irmoarekin lau segundu atera dizkio helmugan hondarribiarren ontziak Kaikukoari. Urdaibai izan da hirugarren bederatzi segundura. Aurreko asteburuan Ama Guadalupekoaren inguruan zalantzak sortu baziren, gaurko lanarekin denak baztertu dituzte Mikel Orbañanosen mutilek. San Miguel ligan bigarren postuan jarraitzen dute eta hurrengo larunbatean etxean jokatuko dute, Hondarribiko estropada eremuan.

                 Joseba Amunarriz, Espainiako Txapelketako bandera astintzen Hondarribian.

Itxura hobea eman du Real Unionek udako laugarren lagunartekoan

FUTBOLA

Bana berdindu zuen atzo Real Unionek C.D. Tudelanoren kontra Galen. Txuribeltzak ez ziren partida irabazteko gai izan, baina joko hobea erakutsi zuten. Lehenengo zatian Tudelano baino gehiago izan zen Union eta 30. Minutuan 1 eta 0ekoa lortu zuen Angulok, penaltiz. 3 Hiru gol sartu ditu dagoeneko bizkaitarrak aurredenboraldi honetan. Bigarren zatian  aldaketa mordoa egiten aritu zen Imanol Idiakez eta nafarrek partidaren kontrola eskuratu zuten, 71.minutuan banakoa sartu zuten arte. Real Unionen hamaikakoa honakoa izan zen: Otermin, Piette, Herreros, Valín, Kijera, Albistegi, Moscardó, Chuchi, Angulo, Colinas eta Juan Dominguez. Bigarren zatian Gabarain, Vizcaíno, Unai, Arzamendi, Lambarri, Infante, Seguro eta Mario sartu ziren.

                       Udako golegile nagusia da Igor Angulo (realunionclub.com)

Dominen ateetan gelditu da Ander Elosegi

PIRAGUISMOA

Beijing 2008ko emaitza errepikatu zuen atzo Ander Elosegi palista irundarrak. Laugarren gelditu zen Joko Olinpikoetako ur bizietako C1 modalitatean. Tony Estanguet frantsesak eraman zuen urrezko domina, Sideris Tasiadis alemaniarrak zilarrezkoa eta Michal Martikan eslovakiarrak brontzezkoa. Elosegik jaitsiera ona egin zuen, garbia eta penalizaziorik gabea. Baina azkenean 102.61eko denborarekin brontzetik 3.7 segundura gelditu zen. 24 urte besterik ez ditu Anderrek eta dagoeneko bi aldiz izan da laugarren Joko Olinpikoetan, bere lehiakortasuna erakutsiz. Hurrengo hitzordu handian, Rio de Janeiron izango du ondo merezitako metala eskuratzeko aukera.

                        Ander Elosegi, atzoko C1eko finalean.

Porrotarekin aurkeztu da Real Union

FUTBOLA

0-2 galdu zuen atzo Real Unionek Beasainen kontra, Galen jokatzen zuen aurredenboraldiko lehenengo partidan. Tenperatura beroa izan bazen ere, giroa hotza izan zen, jende gutxi hurbildu bai zen Stadium Galera. Berdegunean ere antzera aritu zen Real Union, lehenengo zatian gutxienez. Beasainek izan zituen lehenengo 45 minutuetako aukera garbi bakarrak. Bigarren zatian goitik behera aldatu zuen Idiakezek hasierako taldea eta jokalari gazteek erritmo gehiago sartu zioten partidari. Infantek eta Unai Sagredok izan zituzten gol aukera handienak. Baina txuribeltzek ez zuten ate aurrean asmatu eta azken hamar minutuetan bi gol jaso zituzten, akats defentsibo handien ondoren. Ondorengo hamaikakoa zelairatu zuen Imanol Idiakezek: Otermin, Piette, Arzamendi, Herreros, Kijera, Valín, Albistegi, Colinas, Juan Dominguez, Seguro eta Lambarri. Bigarren zatian Echepare, Gabarain, Vizcaíno, Mario, Moscardó, Chuchi, Unai, Angulo eta Infante sartu zituen. Bihar bertan jokatuko du Unionek hurrengo lagunartekoa, Laudioren kontra Arabako lurretan (18.30).

                         Real Union berria.