Zeharo gainditu du Sansek Real Union

Porrota jaso dute txuribeltzek Zubietan

FUTBOLA

REAL SOCIEDAD B 3-0 REAL UNION

REAL SOCIEDAD B: Bardají, Elustondo, Héctor Hernández (Odriozola, 81’), Ugarte, Diarra, Bispo, Hervías (Castro, 83’), Sanz, Iker Hernández, Capilla (Muguruza, 66’), Oyarzun.

REAL UNION: Otermin, Azkoiti, Seguin, Sagastibeltza (Silas, 55’), Esnaola, Rodelar (Ozkoidi, 57’), Urkizu, Alonso (Goikoetxea, 71’), Galán, Eneko Romo, Juan Domínguez.

GOLAK: 1-0: Seguin (bere atean), 29’. 2-0: Capilla, 64’. 3-0: Odriozola, 87’.

EPAILEA: Pardeiro Puente (Cantabria). Txartel horiak: Sagastibeltza, Mikel Alonso, Galán, Romo eta Goikoetxea (Real Union).

Kolore txuri-urdina izan zuen 2.B mailako derbi gipuzkoarrak. Nagusitasunez menderatu zuen atzo Real Sociedad Bk Real Union, Zubietako Z7 zelaian. Abiadura eta maila teknikoa baliatu zituzten donostiarrek talde irundarraren ordena desegiteko. Lehen minutuetan Sanse baino gehiago ere izan zen Union. Presioari eta intentsitateari esker partidaren lema hartu zuen. Baina ordu erdia bete baino lehenago, lehen gola sartu zuen Realak. Hector Hernandez ziztu bizian sartu zen ezker hegaletik, eta erdiratzea bere ate barrura bidali zuen Seguinek.

Gola jaso izanak erabat aldatu zuen Real Unionen itxura. Sansek aldiz, gora egin zuen atsedenaldiaren aurreko minutuetan. Txuribeltzek gogotik sufritu behar izan zuten bigarren gola ekiditeko. Aldagelatik bueltan, norabide berdina mantendu zuen partidak. Zulaikak arriskatzeko hautua egin zuen, eta Rodellar kendu zuen zelaitik, Iosu Ozkoidi zelairatzeko. Real Unionek oreka galdu zuen, eta zelai erdiaren jabetza eskuratu zuten donostiarrek. Ondorioz, kontraeraso bizkorrari esker neurketa erabaki zuen Realak. Capillak egin zuen bigarrena, eta Odriozolak hirugarrena. Gol sorta handiagoa ere jaso ahal izan zuen Unionek. Ligaren hasierako partidarik okerrena egin zuten txuribeltzek Zubietan. Puntu bakarra daukate hiru jardunaldiren ondoren. 

Kiroletik