Eskura dauka liga Hondarribiak

Seigarren bandera irabazi dute berdeek

ARRAUNA

Zortzi puntuko aldea mantendu du Hondarribia Arraun Elkarteak asteburuan. Hortaz, bi jardunaldi gelditzen direla kontuan hartuta, ia erabakita utzi du San Miguel Liga. Denboraldiko seigarren bandera eskuratu dute gainera berdeek Bilbon. Edozein eremu eta baldintza gainditzeko gai dela erakutsi du aurten Ama Guadalupekoak.

Larunbatean hirugarren izan zen Hondarribia Portugaleten. Lehen kalean arraun egiteak kalte egin zion, baina ohiko erregulartasunari eustea lortu zuen. Oriok irabazi zuen bandera, eta Kaiku tartean sartu zenez, bi puntu kendu zizkion berdeen errentari. Kalte handiagoa saihestu zuen hala ere Hondarribiak Ibaizabaleko uretan.

Igandeko jardunaldian bere nagusitasuna berreskuratu du Ama Guadalupekoak Bilbon. Ibaian eta erlojuaren kontra aritu arren, ontzi azkarrena izan da. Itsasbeheran jokatu dute estropada, oso ur gutxirekin. Hala ere, 19’20’’68ko denborarekin, estropada eremuko errekorra egin dute berdeek. Aurkari guztiak gainditu eta bandera eskuratu dute. “La Caixa” korona eskura dauka Hondarribiak.

SAILKAPEN OROKORRA:

1	HONDARRIBIA ORSA	183
2	ORIO BABYAUTO	175
3	KAIKU AMBILAMP	147
4	CABO	107
5	SAN JUAN IBERDROLA	104
6	PORTUGALETE EULEN	95
7	TIRÁN PEREIRA	95
8	ZIERBENA BAHÍAS BIZKAIA	80
9	SAN PEDRO ECOLMARE	78
10	URDAIBAI AVIA	75
11	ASTILLERO	73
12	PEDREÑA	19