Lanaren ordaina jaso du azkenean Real Unionek

Berrogei puntuetako mugara iritsi dira txuribeltzak

FUTBOLA

REAL UNION 1-0 ATHLETIC B

REAL UNION: Otermin, Piette, Valín, Azkoiti, Seguín, Yeray, Eneko Romo, Juan Domínguez (Hugo, 60’), Abaroa (Rodellar, 68’), Vega, Saizar (Goikoetxea, 78’).
BILBAO ATHLETIC: Arrizabalaga, Etxeberria (Lekue, 81’), Gil, Bustinza, Arnáez, Eguaras, Williams (Barco, 73’), Iruarrizaga, Aketxe, Vidal (Guarrotxena, 65’), Merino.
GOLA: 1-0, 77’: Hugo.
EPAILEA: López Toca (Kantabria).

Lasaitu ederra hartu zuen atzo Real Unionek Stadium Galen. Berpiztu egin zen. Sariñenan galdu ondoren, ataka larrian sartu ziren txuribeltzak, baina garaipenarekin arnas egin dute berriro. Ia hiru hilabete zeramatzan Irungo taldeak partidarik irabazi gabe. Atzokoan, gainera, multzoko aurkari gogorrenetarikoa gainditu zuen. Lana, jarrera eta jokoa erakutsi zituen beste behin, eta gola eta emaitza aldeko izan ziren azkenean. Sailkapenean, berrogei puntura iritsi da Union, eta garaipen bat gehiago aski izan dezake maila mantentzeko.

Neurketaren garrantziaren mailan jarri ziren jokalariak, beste inor baino lehenago. Bazkide bakoitzak lagun bana eramateko aukera zuen arren, zale gutxi bildu ziren Stadium Galen. Eta taldearen aldeko oihu eta animoak lotsatiak izan ziren hasieran. Jokalari txuribeltzak, berriz, gogotsu eta kontzentratuta irten ziren zelaira. Sergio Franciscok Rodellar aulkian utzi bazuen ere, defentsaren eta zelai erdiaren artean oreka izan zuen Unionek. Irundarren sendotasunaren aurrean, Athleticek zailtasunak izan zituen arearen inguruan arriskua sortzeko.

Etxekoek izan zituzten aukerarik onenak. 6. minutuan, Azkoitik errematea egin zuen oinarekin korner batetan, baina atezainak eskuekin hartu ahal izan zuen.  14.ean, Yerayk falta jaurtiketa gogorra egin eta baloiak aterako bidea hartu zuen, hesian jo ondoren. Kepa Arrizabalagak eskuarekin atera zuen atearen gainetik. Azken ordu laurdenean aurrea hartzeko abaguneak izan zituen filialak, Bustinzaren eta Williamsen jaurtiketei esker. Lehenengoa zutoinetik hurbil pasa zen, eta bigarrena Oterminek gelditu behar izan zuen.

Bigarren zatia erabakigarri

Atsedenaldiak on egin zion Real Unioni, eta bizitasuna erakutsi zuen berriro berdegunera bueltan. Lehenengo hamar minutuetan arriskua sortu zuten txuribeltzek, Seguinen eta Oscar Vegaren ezker hegaletik batez ere. Zaleak animatu zituen azkenean irteera horrek. 60.minututik aurrera ordea, indarrak parekatzen hasi ziren. Athleticek urratsa eman zuen aurrera, eta bi aldiz saiatu zen Eguaras jaurtiketa arriskutsuekin. Baina Hugo Rodríguez zelaian sartuta, erasoko freskotasuna berreskuratu zuen Unionek.

77.minutuan, Saizarren eta Vegaren arteko jokaldiak atezainaren aurrean utzi zuen Hugo, eta andaluziarrak maisutasunez gainditu zuen Arrizabalaga. Taldeak amorruaz ospatu zuten gola, eta aulkian zeuden jokalariak ere saltoka irten ziren. Azken ordu laurdenean talde txuribeltzak ez zuen arriskatu nahi izan, eta abantaila gordetzean jarri zuen ardura. Hala ere, Hugo Rodríguezek berak neurketa erabakitzeko beste hiru aukera ere izan zituen. Athletic Bk erasora jo zuen gogor, eta irundarrek sufritu behar izan zuten. Baina ahaleginak merezi izan zuen, eta saria jaso zuen azkenean Real Unionek. 

LABURPENA:

Irudiak: txingudionline.com

Gaizka Saizar jokalariaren adierazpenak: