Asteburuko irabazlea izan da Hondarribia

Kantauri itsasora bueltan erakutsi du bere maila Ama Guadalupekoak

ARRAUNA

Denbora gutxi behar izan du Hondarribia Arraun Elkarteak TKE San Miguel Ligako aurkari onenen mailan jartzeko. Sailkapen nagusian Oriok lortutako abantaila ziztu bizian murriztu du Ama Guadalupekoak. Zazpi puntuko aldearekin heldu zioten horiek asteburuari, baina bikoa da gaur diferentzia. Igandeko banderak gutxigatik ihes egin zion arren, Hondarribia izan da asteburuan garaile nagusi. Ohiko eremura, Kantauri itsasora itzuli da San Miguel Liga, eta Hondarribiak bere tokia egin du.

Larunbatean Marina de Cudeyo bandera eskuratu zuen Mikel Orbañanosen taldeak Pedreñako uretan. Ohorezko txandan Orio indartsu irten zen arren, Ama Guadalupekoa aurretik iritsi zen lehen ziabogara. Hortik aurrera, erakustaldi teknikoa eman zuten berdeek, eta abantaila etengabe handitu zuten. 19:43ko denborarekin iritsi ziren helmugara. Oriok hamar segundo gehiago behar izan zituen. Tartean Urdaibai sartu zen gainera, lehenengo txandan segundo bat lehenago sartu baitzen.

Berdintasun sentsazioa Kaikuk areagotu zuen igandean, Kontxako badian. Eusko Label bandera irabazi zuen, larunbateko emaitza kaskarraren ondorioz lehen txandan irten zen arren. Ohorezko txandan, Kaikuren denboraren kontra borrokan aritu zen Hondarribia, eta segundo-hamarren bakarrekoa izan zen azkenean diferentzia. Bidasoarrek ezin izan zuten asteburua borobildu, baina balorazioa bikaina izan daiteke. Orio bosgarren izan zen atzo, Urdaibai eta Portugalete ere aurretik izan zituelako. Ondorioz, sailkapeneko aldeak estutu egin dira. Datorren asteburuan Pasai San Pedron eta Orion izango dira Ligako estropadak. Lehenago, Gipuzkoako Txapelketa jokatu du Hondarribiak asteazkenean.

SAILKAPEN OROKORRA:

1	ORIO BABYAUTO	53
2	HONDARRIBIA ORSA	51
3	KAIKU AMBILAMP	44
4	TIRÁN PEREIRA	33
5	ZIERBENA BAHÍAS BIZKAIA	30
6	SAN JUAN IBERDROLA	28
7	CABO	26
8	PORTUGALETE EULEN	25
9	ASTILLERO	21
10	SAN PEDRO ECOLMARE	20
11	PEDREÑA	4
12	URDAIBAI AVIA	-41