23
urtez azpiko txirrindularien arteko lehia izango da Behe Bidasoako errepideetan
TXIRRINDULARITZA
42.Bidasoa Itzulia jokatuko da
gaurtik larunbatera bitarte eskualdeko errepideetan. 23 urtez azpiko
txirrindularien tropela bilduko du lau etapako lasterketak. 21 taldek parte
hartuko dute azkenean. Horien artean Frantziako Blagnac eta Sud Gascogne,
Belgikako Abutriek, Italiako Colpack eta Errusiako Lokosphinx. Euskal Herriko
talde onenak ere izango dira errepidean, Caja-Rural, Baqué-Campos, Gipuzkoa-Oreki
edo Seguros Bilbao tartean.
Erreferentzia nagusien
artean, joan den urtean bigarren izan zen Martín Lestido egongo da, Mutua
Levante taldean. Imanol Estevez laugarren izan zen, eta Zirauna taldean dago
aurten. Loic Chetout baionarra ere faboritoen artean egongo da. Bi etapa
irabazi zituen joan den urtean, eta Blagnac taldean dago aurten. Caja Ruralen
erreferentzia Miguel Ángel Benito izango da, eta Lizarterena Marc Soler.
Azken
eguna erabakigarri
Ohiko formatoa izango du
Bidasoa-Itzuliak. Lehenengo etapa Hendaian irtengo da, eta Irunen bukatu.
118km-ko ibilbidea izango du eta sprint-ean bukatuko dela aurreikusi daiteke.
Bukaera berria probatuko du antolakuntzak, Hondarribia kalean. Bigarren etapa
Hondarribian hasi eta bukatuko da, 128km osatu ondoren. Jaizkibel mendatea
izango da zailtasunik handiena, helmugara iristeko zortzi kilometroren faltan.
Hirugarrena etapa berezia
izango da. Orion hasi eta bukatuko da, eta ohi baino ibilbide laburragoa izango
dute txirrindulariek, 91km-rekin. Aiako malda gogorrek nahikoa zailtasun emango
diote hala ere. Laugarren eta azken etapa izango da laburrena, gogorrena eta
lasterketa erabakiko duena. Irunen hasi eta bukatuta, Aritxulegi, Agina eta
Erlaitz mendateak igo beharko dituzte txirrindulariek. Irungo Colon pasealekuan
bukatuko da Bidasoa Itzulia, larunbatean arratsaldeko bostak inguruan.
No hay comentarios:
Publicar un comentario