Banderaren bila

Irailaren 8an jokatuko du Hondarribiak Kontxako Banderako bigarren jardunaldia

ARRAUNA

Bandera irabazteko aukerarekin iritsi da Ama Guadalupekoa Kontxako bigarren jardunaldira. Ohorezko txandan lehiatuko da, Urdaibairekin, Oriorekin eta Kaikurekin batera. Joan den igandean hiru segundoko aldea lortu zuten bermeotarrek berdeekiko. Orio sei segundora gelditu zen eta hamahirura Kaiku. Itsaso barea izatekotan Urdaibai da hortaz faborito nagusi, baina Itsaso zakarrarekin, aukerak zabalduko lirateke. Eta iragarpenek eguraldi txarra ematen dute iganderako.

Irailaren zortzian jokatuko da jardunaldi erabakigarria.  Hondarribiko Jaietako egun nagusia da eta zaila izango da Donostian marea berde handia ikustea. Baina arraunlariek bandera herrira eramaten badute, festa handia izan daiteke. Historian behin gertatu da Kontxako bigarren jardunaldia irailaren 8an jokatzea. Eta Hondarribiak eraman zuen bandera. Aurten ere, Kontxako hamaikagarren Bandera irabazi nahi du Hondarribia Arraun Elkarteak.

Joseba Amunarriz eta Osertz Aldai (todoremo.com)

Hondarribiko entrenatzailearekin Antxeta Irratian izandako elkarrizketa.