Real Unionek ez du amore ematen

FUTBOLA

REAL UNION 4-1 REAL SOCIEDAD B

REAL UNION: Otermin, Gabarain, Andriu, Herreros, Kijera, Albistegi, Moscardó, Chupe, Juan (Chuchi, 82’), Angulo eta Lambarri (Infante, 83).
REAL SOCIEDAD B: Tena, Zaldua, Morgado, Gaztañaga, Etxebaguren, Castañeda, Barcina (Nanizayamo, 77’), Sanz (Beitia, 58’), Kodro, Ozkoidi eta Hernández.

Partidako hamabigarren minutuan gola jaso arren, markagailua irauli eta garaipen garbia lortzeko gai izan zen atzo Real Union. Realeko gazteak indartsu irten ziren eta bosgarren minuturako Iker Hernandezek lehenengo aukera izan zuen. Zazpi beranduago Kenan Kodrok jaurtiketa ia geldiezina egin zuen areako mugatik, filiala aurretik jarriz. Golak Real Union esnatu zuen eta hortik aurrera lehenengo zatia txuribeltza izan zen. Ezker hegaletik iritsi zen arrisku handiena eta aurretik hainbat aldiz huts egin ondoren, 34. minutuan berdinketa jarri zuen Lambarrik, Anguloren erdiraketa buruz errematatuz. Hamar minutu beranduago, bizkaitarrak berak irundarren bigarrena sartu zuen, Gaztañagak jaurtiketa desbideratu ondoren.

                Atsedenalditik bueltan, partidak bizitasuna galdu zuen. Hala ere, Real Union eroso aritu zen abantailaren defentsan. 66. minutuan Morgadok bigarren txartel horia jaso zuen, baina Sansek ezusteko bat emango zuen oraindik. Ordu laurdenaren faltan, epaileak Kodroren bigarren gola baliogabetu zuen jokoz kanpokoagatik.  Bost minutu beranduago Juan Dominguezek Lambarriren erdiratzea sarera bidali zuen eta Galen lasaitasuna nagusitu zen. Festa borobiltzeko Igor Angulok laugarrena sartu zuen Moscardóren jokaldi onaren ondoren Tena atezaina gaindituz. Laugarren postutik urrun dago Real Union, baina urtarrileko emaitza txarrak atzean gelditu dira eta azken bederatzi puntuetatik zazpi lortu ditu. Datorren asteburuan Osasuna Bren kontra jokatuko dute txuribeltzek Taxoaren.

realunionclub.com