Laugarren postura igo da Bidasoa-Irun

ESKUBALOIA

BIDASOA IRUN 29-24 CALMEC BARAKALDO

BIDASOA IRUN: Mouriño (12), Gimeno (2), Ander Ugarte (4), Aranburu (1), Aldunate (2), David Rincón (4), Roberto Álvarez (4). Zubiria (1), Crowley (4), Jon Azkue (4), Fernando Rincón (4), Ander Ruiz eta Cavero.

CALMEC BARAKALDO: Urretxa (16), Sarasola, Lucas (2), Borda (1), Piritz (2), Macías (3), Joseba Rodríguez. Aurrekoetxea, Bordegaray (5), Momeñe, Ortuondo (7), Oier García (3), Valderrama (1) eta Martínez.

Estualdi handirik pasa gabe irabazi zuen atzo Bidasoa-Irunek Artalekun. Lau porrot zeramatzan segidan etxean eta bolada hori apurtzeaz gain, Pozoblancoko garaipenari jarraipena eman dio talde irundarrak. Barakaldo baino gehiago izan ziren horiak atzoko partidan eta mugimendu eta joko azkarrari esker, erraztasun handiarekin gainditu zuten bizkaitarren defentsa irekia. Bidasoa ondo sartu zen partidan hamargarren minuturako 6-2 irabazten ari zen. Baina ondoren 2-8ko kontrako partziala jaso zuen eta 8-10 jarri ziren ezkerraldekoak aurretik. Minutu txar horien ondoren irundarrak berrantolatu ziren eta atsedenaldira gol bateko aldearekin joan ziren (13-12).

                Bigarren zatian zehar irundarrak nagusi izan ziren, markagailuan abantaila erabakigarririk lortu gabe. Hiru eta lau goleko aldea irekitzen zuten bakoitzean, Barakaldok murriztu egiten zuen. Bost minuturen faltan, gol bakarrera jartzeko aukera izan zuten ezkerraldekoek, baina erasoan baloia galdu zuten  eta Gimenok  kontraerasoan arriskua uxatu zuen. Hurrengo jokaldian, Zubiriak penaltia gelditu ondoren, Jon Azkuek lau golera zabaldu zuen berriro horien abantaila. Garaipenak indar handia eman dio Bidasoari eta gainera, sailkapeneko laugarren postura eraman du. Bost talde daude puntu bakarreko distantzian eta play-off postuetan sartzeko lehia oso estua izango da. Datorren larunbatean irteera zaila izango du Bidasoak. Santanderren jokatuko du, bosgarren dagoen Adelma Sinfinen kontra.

diariovasco.com