Berdinketa ez da nahikoa Unionentzat

FUTBOLA

UD LOGROÑÉS 0-0 REAL UNION

UD LOGROÑES: Sergio, Gil, Jano, Iturralde, Alejandro (Sergio Dominguez, m.67), Garban (Quero, m.46), Alain Barrón, Raúl Torres, Iñaki, Ubis eta Sergio Rodriguez.
REAL UNION: Otermin, Gabarain, Kijera, Moscardó, Valín, Albistegi, Andriu, Chupe, Angulo (Infante, m.76), Juan Domínguez eta Lambarri.

Play off-era hurbiltzeko beste aukera on bat galdu du Real Unionek. Husna berdindu zuen igandean Las Gaunas futbol zelaian, UD Logroñesen kontra. Ontzat emateko moduko emaitza izan daiteke, baina ligako azken txanpan sartuta, denbora agortzen ari zaio talde irundarrari. Amorebietak eta Barakaldok bana berdindu zuten larunbatean, eta desabantaila murrizteko aukera galdu du berriro Unionek. Partida eskasa izan zen ikuskizunari dagokionean. Intentsitate, abiadura eta aukerak falta izan zitzaizkion. Unionek bezala, Logroñesek ere asko zuen jokoan, azken jardunaldietan jaitsiera postuetara hurbildu baita. Urduritasun eta tentsio horrek kanpokoei egin zien mesede eta hasi bezain pronto Andriuk lehenengo abisua eman zuen jaurtiketa gogor batekin. Minutuek aurrera egin ahala etxekoak nagusitzen hasi ziren baina atsedenaldiaren aurretik, Albistegi izan zen bigarren jaurtiketa arriskutsua egin zuena.

            Bigarren zatian errioxarrak irten ziren hobeto eta aukerarik onenak izan zituzten lehenengo minutuetan. Oterminek desbideratu zuen lehenengoa eta atzelari txuribeltzek bigarrena. Hortik aurrera Logroñesek kontrolatu zuen jokoa, eta Unionek baloi geldituan lortu zuen arriskua eramatea. Markagailua hala ere, ez zen aldatu eta 90. minutua iritsi zen beste gol aukera garbirik gabe. Luzapenean aldiz, denetarik gertatu ahal izan zen. Lehenengo Raul Torresek izan zuen aukera Logroñesentzat, baina Oterminek ondo gelditu zuen baloia. Eta partida bukatzear zela, Moscardók garaipena eman ahal izan zion Real Unioni korner batetan. Erremate ona egin zuen baina atezain errioxarrak gelditu zuen. Datorren igandean, Sestao Riverren bisita jasoko du Unionek, arratsaldeko bostetan Stadium Galen. Ezkerraldeko taldeak Alaves liderraren aurka berdintzea lortu zuen igandean Las Llanasen, beraz lan handia izango du berriro Real Unionek. Eta Alavesen etxean jokatuko du hain zuzen ere, laugarren dagoen Amorebietak. Hortaz, desabantaila murrizteko aukera izango du berriro Imanol Idiakezen taldeak.

diariovasco.com