Puntu ona lortu du Real Unionek Ipuruan

FUTBOLA

SD EIBAR 1-1 REAL UNION

SD EIBAR: Xabi, Bóveda, Arregi, Arruabarena (Mainz,68´) Arroyo ( Julen, 75´) , Dani García, Yuri, Diego, Roldan, Jito (Aimar, 60´) eta Navas
REAL UNION: Otermin; Gabarain, Andriu, Toño (Herreros, 89´), Kijera, Valín, Moscardó, Lambarri(Infante, 68'), Albistegi, Juan Domínguez (Samuel, 89') eta Angulo.

Puntu banaketa izan zen atzoko derbiaren emaitza. Partida itsusia izan zen zaleentzat eta gogorra lehian izan ziren jokalarientzat. Ipuruako zelaiaren egoera tamalgarria zen eta lanerako eta borrokarako prest irten ziren taldeak. Lehengo zatia berdindua izan zen eta joko gutxi eta baloi luze asko ikusi ahal izan ziren. Atsedenalditik bueltan, bigarren zatiko lehenengo minutuan, etxekoen aldeko penaltia ikusi zuen epaileak. Jitok bat eta hutsekoa jarri zuen Eibarrentzat, partida ondo bideratuz.

Txuribeltzek lanean jarraitu zuten eta pixkanaka zelai erdian nagusitzen joan ziren. 63. minutuan penaltia egin zion defensa armaginak Juan Dominguezi eta Igor Angulok banakoa eta emozioa jarri zituen markagailuan. Eibarrek aurrera pausoa eman zuen garaipenaren bila, baina bukaeran Real Union izan zen aukera garbienak izan zituen taldea. Moscardók eta Infantek atearen aurrean huts egin zuten eta azkenean berdinketarekin konformatzen bukatu zuen Unionek. Ontzat eman daitekeen puntua lortu zuen Idiakezen taldeak, play-off postuetatik urrun jarraitzen duten arren. Datorren astean derbia izango dute berriro txuribeltzek. Galen jokatuko dute larunbatean, Real Sociedad Bren kontra.

diariovasco.com