Sari handia eraman du Alavesek Galetik

FUTBOLA

REAL UNION CLUB 0-1 DEPORTIVO ALAVES

REAL UNION: Villanueva, Piette, Andriu, T. Vázquez, Kijera, Vicente (Lambarri, 73’), Valín, Albistegi, Angulo (Colinas, 66’), Juan Domínguez eta Chupe.
ALAVES: Crespo, Rubio, Agustín, Javi Hernández, Juanje, Beobide, Jaume, Manu García, Laborda (Sendoa, 84’), Viguera (86’) eta Luimsi (Guzmán, 70’).

Alavesi aurre egin eta itxura ona eman zuen arren, porrot mingarria jaso zuen atzo Real Unionek. Partidako seigarren minutuan egindako akatsak kondenatu zituen txuribeltzak. Manu Garcíak ateratako falta batean, defentsa irundarrak huts egin eta Labordak bakarrik errematatu zuen. Baloiak aterako bidea hartu zuen eta ezinezkoa zirudien arren, Villanueva atezainaren gainetik sartu zen. Golaren ondoren, Idiakezen taldeak berean jarraitu zuen eta lehenengo zatian zehar erabat menderatu zuen Alaves. Baloia irundarrena zen, baina gol aukerak ez ziren iritsi. Arabarrek, kontraerasoan, bigarren gola sartu eta partida erabakita uzteko aukera izan zuten, baina irundarrak bizirik iritsi ziren atsedenaldira.

                Bigarren zatian partidak norabide berdina izan zuen. Real Union gehiago izan zen jokoan, baina ez zuen gol aukera argirik izan. Alaves sendo aritu zen defentsa lanetan eta ez zuen hutsunerik utzi. Etenaldi bakoitzean denbora pasatzen utzi zuten gasteiztarrek eta horrek, eta epailearen erabakiek, Galeko zaleak piztu zituen. Imanol Idiakezek aldaketa bilatu nahi izan zuen eta Lambarri eta Colinas zelairatuta arriskatzea erabaki zuen. 73.minutuan Manu Garciak bigarren txartel horia jaso zuen eta momentu horretatik aurrera txuribeltzen aukera onenak iritsi ziren. 91.minutuan Chupek ateratako kornerra errematatu zuen Toñok eta bere burukada zutoinera joan zen. Berdinketa merezi zuen Unionek, baina hiru puntuek Gasteizerako bidea hartu zuten. Sailkapeneko zazpigarren postura jaitsi da Real Union eta zortzi puntura dauka dagoeneko laugarren sailkatua.

diariovasco.com