Kolpe handia jaso du Real Unionek Sariñenan

Azken sailkatuaren kontra ere galdu du talde txuribeltzak

FUTBOLA

SARIÑENA 1-0 REAL UNION

SARIÑENA:  Ribas, Nacho Gómez, Laguarta, Felez, Camus, Carmelo (Valencia, 66’), Llopis, Moustapha, Teto, Arcega (Jorge Sánchez, 78’), Gassama (Mohammed, 80’).

REAL UNION: Otermin, Piette, Yeray, Valín, Seguin (Aimar, 72’), Rodellar, Eneko Romo, Hugo Rodríguez, Abaroa (Balerdi, 75’), Juan Domínguez (Saizar, 45’), Goikoetxea.

GOLAK: 1-0: Teto, 11’.

EPAILEA: Julián García García (Kantabria).

Etorkizun iluna dauka Real Unionek. Bost jardunaldi gelditzen dira liga bukatzeko, eta 37 puntutan trabatuta jarraitzen du. Gaurko partidetan ematen diren emaitzen arabera, bi puntuko aldearekin gelditu daiteke jaitsierarekiko. Atzo porrot gogorra jaso zuten irundarrek Sariñenan. Hiru puntu eskuratzeko itxaropenez bidaiatu zuten. Baina Hirugarren Mailara matematikoki jaitsi den aurkari batek ere mendean hartu zituen. Zorigaiztoko arratsaldea izan zen atzokoa Unionentzat.

Sariñena gehiago izan zen El Carmen futbol zelaian.Lehenengo aukerak txuribeltzek izan zituzten arren, 11.minuturako aurrea hartu zuten etxekoek markagailuan. Tetok sartu zuen gola, ezker hegaletik egindako jokaldiaren ondoren Xixa Otermin gaindituta. Onena, Unionek 80 minutu zituela partida berdindu eta irabazten ahalegintzeko. Ordu laurdena beteta, Abaroari penaltia egin ahal izan zioten, baina epaileak ez zuen adierazi. Ondoren, Oterminek hiru geldiketa ere egin behar izan zituen bigarren gola ekiditeko.

Sergio Franciscok aldaketa egin zuen atsedenaldian. Juan Domínguez aulkian gelditu zen, eta Gaizka Saizar irten zen bere ordez. Hala ere, bi aurrelarirekin jokatzeak ez zuen irundarren eraginkortasuna hobetu. 65.minutuan Hugo Rodríguezek aukera ona izan zuen, baina atezaina fin ibili zen baloia desbideratzeko. Sariñenak sendo jarraitu zuen defentsan, eta azken minutuetan iritsi ziren Real Unionen aukera onenak. 88.ean Pablo Balerdiren jaurtiketa Ribasek gelditu zuen. Luzapenean, behintzat puntu bat eskuratzeko abagunea izan zuen Goikoetxeak, baina atearen gainetik irten zen errematea. Real Unionen krisiak ez dauka etenik, eta konponbideak aurkitzeko aukerak agortzen ari dira.

diariovasco.com