Mikel Alonso eta Silas fitxatu ditu Real Unionek

Tolosarrak lehen entrenamenduan parte hartu du

FUTBOLA

Beste bi fitxaketa itxi ditu Real Unionek, taldea entrenatzen hasi den egunean. Mikel Alonso Olanok gaur bertan sinatu du urte baterako kontratua. 34 urteko tolosarra da Alonso eta eskarmentu handia dauka futbolean. Realean 111 partida jokatu zituen, Lehenengo Mailan. Ondoren, Premier Leagueko Boltonen, Tenerifen eta Charlton Athleticen aritu da Alonso. Duela bi urte Unioneko lehen taldearekin entrenatzen ibili zen, fitxarik egin gabe. Oraingoan elastiko txuribeltza defendatuko du 2.B mailan.

Sid’Ahmed Sidati Malainine “Silas”, futbolari moduan Euskal Herrian hazi den jokalari sahararra da. Laudion eta Sestao Riverren jokatu du. 24 urte ditu eta hegaleko jokalari azkarra da. Bihar hasiko da sahararra Real Unioneko taldekideekin entrenatzen. Gaurko saioan Aitor Zulaika entrenatzaileak aurreratu du beste bi edo hiru jokalari espero dituela taldea borobiltzeko.

    MIKEL ALONSO                                              SILAS