Vasconia
menderatu zuten atzo berdeek Hondartzan
FUTBOLA
HONDARRIBIA
1-0 VASCONIA
Azken jardunaldiko azken
segundora arte sufritu behar izan du Hondarribia Futbol Elkarteak denboraldiko
helburua betetzeko. Baina atzo Vasconiari irabazita, mailari eustea lortu du
Mikel Llorentek zuzentzen duen taldeak. Hil edo biziko partida jokatu zuen
Donostiako Vasconiaren kontra. Tentsio handiko neurketa izan zen, baina giroa
aldeko izan zuen Hondarribiak. Hondartza lepo bete zuten herritarrek, eta babes
handia izan zuten jokalariek hasieratik.
Zelaian, etxekoen irteera
indartsuaren ondoren, Vasconiak eskuratu zuen baloiaren jabetza. Berdeen area
inguruan ibili zen baloia lehenengo ordu erdian zehar. Lehenengo zatiaren azken ordu laurdenean hasi
zen Hondarribia arriskua sortzen, eta atsedenaldiaren atarian sari handia jaso
zuen. Aitor Tijerok 1-0ekoa egin zuen, area kanpotik egindako jaurtiketa
indartsuarekin. Partida aldeko jarri zitzaion etxeko taldeari, baina lana
zegoen aurretik. Donostiarren gol bakarrak Preferentera bidaliko zituen
berdeak.
Bigarren zatian Hondarribiak
ez zuen burua galdu nahi izan. Abantaila gordetzean jarri zuen ardura,
defentsan sendo mantenduz eta kontraerasoan bigarren gola egiteko asmoz.
Minutuek aurrera egin ahala, jokoa eteten eta oztopatzen ahalegindu ziren,
abantailari eusteko helburuarekin. Jokoan zegoena agerian gelditu zen. Esanguratsua
da bederatzi jokalarirekin bukatu zuela Hondarribiak, eta hamarrekin
Vasconiak.
Luzapen bukaezina eta
ospakizuna
90.minutua beteta, sei
minutuko luzapena eman zuen epaileak, eta donostiarren azken erasoekin sufritu
behar izan zuten etxekoek. Behin partida bukatuta, pozez ospatu zuten salbazioa
jokalari berdeek, eta zaleei emandako laguntza ere eskertu zieten. Egoera
larria bizi izan du Hondarribiak, baina aurrera ateratzen jakin izan du.
Hurrengo denboraldietarako irakaspen aberasgarria izan da jokalari
gazteenentzat.
Kiroletik. Argazki gehiago: https://www.facebook.com/kiroletik
No hay comentarios:
Publicar un comentario