Kiroletik: Itxura ona eman du Real Unionek etxeko lehenengo partidan

Aurreneko hiru puntuak lortu dituzte txuribeltzek Galen

FUTBOLA

REAL UNION 2-0 PEÑA SPORT

REAL UNION: Otermin; Piette (Yeray, 48'), Valín, Azkoiti, Aimar; Rodellar, Romo (Vega, 77'), Juan Domínguez; Gabilondo, Saizar (Abaroa, 66') eta Balerdi.

PEÑA SPORT: Gonzalo; Iván, Igotz (Maeztu, 49'), Eder, Sito; Garde, Barace (Xabi, 49'), Carlos, Uriz; Javi eta Toni (David, 68').

Golak: 1-0, 12’: Juan Domínguez; 2-0, 50’: Eneko Romo.

Epailea: Fuente Martín, Cantabria.

Ezusteko atsegina jaso zuten atzo zale txuribeltzek Stadium Galen. Denboraldiko lehenengo hiru puntuak eskuratu zituen Real Unionek, Peña Sporti nagusitasun osoz irabazita. Lehenengo zati borobila egin zuen Sergio Franciscoren taldeak. Indartsu irten zen berdegunera eta joko biziarekin nafarren atea erasotzen hasi ziren. Domínguezek eta Balerdik izan zituzten lehenengo aukerak, eta haiek izan ziren protagonista 1-0ekoan. Gabilondoren erdiratzea Pablo Balerdik errematatu zuen lehenengo, eta atezainak baloia desbideratu ondoren, Juanek aldaratzean sarera bidali zuen. Irundarrek baloia kontrolatzen jarraitu zuten eta aldea handitzeko abaguneak izan zituzten. Defentsan sendo aritu ziren eta nafarrak ez ziren arriskua sortzeko gai izan. Salbuespena ordu erdia pasata iritsi zen. Jaurtiketa batek langan jo zuen eta Eneko Romok atepetik atera zuen baloia.

Atsedenaldiaren ondoren erabaki zuen partida Unionek. Eneko Romok berak eman zien lasaitasuna irundarrei, ezker aldetik jaurtitako baselina eder batekin. Hortik aurrera, zaleak pozik eta taldea eroso. Bigarren zatian partidak erritmoa eta ikusgarritasuna galdu zuen. Peña Sportek arriskatu behar izan zuen eta aldea murrizteko aukerak izan zituen, baina orokorrean etxekoek ez zuten estualdirik pasa. Albiste txarrena Samuel Piettek utzi zuen. Orkatila bihurritu eta aldaketa eskatu behar izan zuen. Taldeak ondo bukatu zuen partida eta hiru puntuak Stadium Galen gelditu ziren. Eraikitze prozesuan dago oraindik Real Union, baina itxura ona hartzen ari da poliki. Aste honetan sendotzen jarraitzen aukera izango du. Bi bisita egin beharko dizkio Laudioko Ellakuri zelaiari. Kopako kanporaketa izango du asteazkenean, eta ligako hirugarren jardunaldiko partida igandean.

Beste bi fitxaketa

Bi jokalari lotu zituen atzo Real Unionek. Taxoaretik iritsiko dira biak. Hugo Rodríguez andaluziarra da eta Osasuna Bn aritu zen azken denboraldian. Bi hegaletan jokatu dezake eta sei gol egin zituen filial gorritxoarekin. Julen Itxaso aldiz, hemeretzi urteko atezain gaztea da.