Hasiera mingarria izan du Real Unionek

Txuribeltzen lanak ez du saririk izan

FUTBOLA

LEGANES 2-1 REAL UNION

LEGANES: Barrio, De la Vega, Mantovani (Postigo, 65’), Santamaría, Gómez, Marin, Eraso, Martínez, García (Ruiz, 65’), Velasco eta Moreno (Pirez, 73’).
REAL UNION: Otermin, Morcillo (Yeray, 56’), Aimar, Valin (Saizar 80’), Azkoiti, Rodellar, Gabilondo, Vega, Domínguez, Romo (Abaroa 64’) eta Balerdi.

EPAILEA: Moya Baena (Andaluzia).

Azken minutuan galdu zuen atzo Real Unionek, ligako lehenengo jardunaldian, Butarque futbol zelaian. Ondo hasi zen partida irundarrentzat, aukera garbirik egin gabe, lehenengo jokaldi arriskutsuan gola sartu baitzuen Pablo Balerdik. Azken denboraldian jokalari garrantzitsu bilakatu zen billabonakoa filialean, eta titular izan zen atzo Leganesen. Ordu erdia betetzear zela Gabilondoren jokaldia errematatu eta denboraldiko lehenengo gola egin zuen irundarrentzat. Hala ere, lehenengo zatiko azken minutuetan etxekoen gola hurbil izan zen. Aldagelara joan aurretik, Erasok zutoinera bidali zuen baloia. Bigarren zatian gertatuko zenaren aurrerapena zen.

Atsedenaldiaren ondoren, Leganesek eskuratu zuen baloia eta jokoaren jabe izan zen etengabe. Real Unionek defentsan jarri zuen arreta, lortutako abantaila mantentzeko asmoz. Lan ikaragarria egin zuten txuribeltzek eta Oterminen gelditu saio bikainarekin batera, partidaren azken txanpara bizirik iristea lortu zuten. Hala ere, ordu laurdenaren faltan banakoa jarri zuen Fer Ruizek. Puntua ona zen kanpokoentzat, eta hura mantentzeko ahaleginetan jarraitu zuten. Partidaren azken minutura iritsita, lau minutuko luzapena eman zuen epaileak eta 93.ean, bigarrena sartu zuen Leganesek Pirezi esker.

Galen indarrez hasi behar

Etxean bilatu beharko du lehenengo garaipena Real Unionek. Tafallako Peña Sport hartuko du igandean Stadium Galen. Sailkapen nagusiari dagokionez, hamabosgarren postuan dago Union lehenengo jardunaldiko emaitzak kontuan hartuta.

Balerdi protagonista izan zen (deportivoleganes.com)