FUTBOLA
REAL UNION 2-1 ATHLETIC B
REAL UNION: Villanueva,
Piette, Andriu, Valín, Kijera, Albistegi, Moscardó, Juan Domínguez (Balerdi,
83'), Chupe (Herreros, 93'), Lambarri, Angulo (Infante, 80').
ATHLETIC B: Magunazelaia, Bustinza,
Jon García (Royo, 74'), Albisua, Saborit, Morán, Eraso, Peña, Goti
(Guarrotxena, 46'), Lander (Guillermo, 83'), Vidal.
Garaipenarekin agurtu zituen zaleak
Real Unionek. Partida erakargarria eskaini zuen atzo Stadium Galek, multzoko bi
talde onenetarikoen artean. Jokoan ezer gutxi izan arren, oso indartsu irten
zen Athletic B eta presio itogarriari esker, nagusi izan zen lehenengo
minutuetan. Ordu laurdena beteta, arratsaldeko lehenengo gola sartu zuen Jonxa
Vidalek. Falta alboratu bat atera eta Villanueva atezaina ezustean hartu zuen,
kanpokoei abantaila emanez. Jarraian beste abagune garbi bat izan zuen Bilbao
Athleticek eta Piettek desbideratu behar izan zuen baloia azken momentuan. Real
Unionek estualdia izan zuen defentsan baina 33.minutuan, Lambarriri egindako
penaltia ikusi zuen epaileak eta Angulok banakoa sartu zuen.
Bigarren zatian zurigorriek
nagusi izaten jarraitu zuten baina denborarekin Unionek presiotik libratzea lortu zuen. Dominguezek, Chupek eta Lambarrik gola
hurbil izan zuten. Sergio Franciscok Infante eta Balerdi zelairatu zituen eta
gazteek aldaketa eman zioten erasoari. 87.minutuan aukera bikoitza izan zuen
Unionek eta hurrengo minutuan gola iritsi zen. Infantek egin zuen erdiratzea
eta Andriuk bidali zuen baloia sarera. Athletic Bk berdinketa lortzeko denbora
izan zuen baina ez zuen asmatu eta hiru puntuak etxean gelditu ziren. Real
Unionek Tudelano aurreratu du sailkapenean eta Tuteran bertan jokatuko ditu
Errege Koparako sailkatzeko azken aukerak. Zaleek txalo zaparradarekin eskertu
zuten jokalariek urtean zehar egindako lana.
realunionclub.com
No hay comentarios:
Publicar un comentario