Txapelketa eta igoera lortu ditu Mariñok

Bigarren Mailan jokatuko du hurrengo denboraldian talde irundarrak

FUTBOLA

TOLOSA 2-3 MARIÑO

Aurtengo Euskal Liga irabazi du Mariño talde irundarrak. Sari handia jaso du gainera, Emakumeen Bigarren Mailara igotzea lortu baitu ondorioz. Atzo goizean erabaki zuen liga Mariñok, Tolosako Usabalen irabazita. Maila mantentzeko lehian dago Tolosa, eta lan handia egin behar izan zuten irundarrek hiru puntuak eskuratzeko. Baina Marinak, Uxoak eta Nekanek satutako golak aski izan ziren garaipena bermatzeko.

Igoera lortuta, denboraldi bikaina borobildu dute Mariñoko neskek. Nagusi izan dira Euskal Ligan, eta gorako bidea hartu dute hasieratik. Hamazazpi partida irabazi dituzte, bost berdindu eta bi bakarrik galdu. Berrogeita zazpi gol sartu dituzte, eta hamabost jaso.  Beste bi jardunaldi gelditzen dira liga bukatzeko, baina helburua bete du dagoeneko Mariñok. Hurrengo denboraldian Bigarren Mailan jokatuko du, Oiartzun, Añorga eta Osasuna moduko taldeekin batera.

Mariñoko neskak igoera ospatzen (Oskitz Saizar Lekuona)

Bideoa: Angel Bertiz Subizar