Argazkia: Fernando Lozano
FUTBOLA
Entrenamendua
bukatzeko, partidatxoa jokatzen ari dira Real Unioneko jokalariak Irungo
Stadium Gal futbol zelaian. Intentsitatea handia da, nabari da neurketa
garrantzitsua daukatela igandean. Ezker lateralean Aimar Sagastibeltza dabil, hegalean
gora eta behera. Ia bost hilabete egin ditu leitzarrak ligan lehiatu gabe. Hautsitako
ukondoa babestuta darama oraindik. Luze egin zaio denbora. Baina jokatzeko
prest dago orain. Irribarrez egin du aldagelarako bidea.
Denboraldi
gogorra izan da aurtengoa. Zelaian baino ordu gehiago pasa ditut gimnasioan,
edo fisioarekin errehabilitazioan.
Irungo Luis Mariano
pasealekuko terraza batean eserita dago orain Sagastibeltza. Eguzkitakoaren
babesean, lasai ederrean. Ur botilatxoa eta grabagailua ditu aurrean.
Askoz
gehiago sufritzen da futbol zelaitik kanpo. Ikusten duzu emaitzak ez direla
iristen, eta taldea ez dabilela ondo. Baina ezin duzu lagundu, eta horrek
frustrazio ikaragarria sortzen du. Futbolaren alderik okerrena da lesioena.
Aurrekaririk gabeko
esperientzia gogorra izan da aurtengoa Aimar Sagastibeltzarentzat. Baina,
eskarmenturik ez zaio falta futbolaren munduan. 2.B mailan ari den arren, behe-behetik,
Erregional Preferentetik hasitako jokalaria da. Hirugarren Mailan urteak eman
ditu, eta Bigarren Mailan jokatzeko aukera ere izan du. Berandu hasi zen, hala
ere, futbolean.
Kirol
tradizio handiko herria da Leitza. Bereziki herri kirol zalea da, eta pilota
zalea. Baina niri futbola gustatzen zitzaidan. Hamabost urterekin Tolosan hasi
nintzen (Leitzatik 21km-ra),
eta zazpi urte eman nituen han,
kadetetan hasi eta Hirugarren Mailara bitarte.
Pilotan
ere ariko zinen Leitzako plazan.
Pilotan
txikitatik, herriko plazan, eta frontoian ere bai, Pilota Eskolan. Gaizki dago
nik esatea, baina nahiko ongi moldatzen nintzen. Proportzioan, futbolean baino
hobe agian.
1984ko kintakoa da Aimar
Sagastibeltza. Leitzan, kirolarekin lotura estua dauka urte horrek. Eskolan,
Inaxio Perurena harrijasotzailea, Mikel Nieve txirrindularia eta Oinatz
Bengoetxea pilotaria izan zituen kide. Azken honekin frontoian hamarnaka
partida jokatutakoa da.
Lehengusu
txikia da Oinatz, bere amona eta nire aitona anai arrebak dira. Bost-sei urte
genituenetik ibili ginen elkarrekin Pilota Eskolan. Oinatz oso ona zen, eta
trofeo pila bat irabazi nituen berari esker.
Iñaki Perurena, Mieltxo
Saralegi edo Abel Barriola gehituta, deigarria da Leitzak eman duen goi mailako
kirolarien kopurua. 3.000 biztanle ere ez ditu Nafarroako mendialdeko herriak.
Jende
askok galdetzen du zein den arrazoia, eta zaila da esatea. Kirol zaletasun
handia dago, haurrek txikitatik nahi izaten dute kirolen bat praktikatu. Lehen
pilotari izan nahi zuten gehienek, baina orain, Mikel Nieve bezalako
erreferenteak edukita, beste kirol batzuk ere aukeratzen dituzte. Nik uste hori
dela arrazoi nagusia, erreferentzia handiak izan ditugula aspalditik.
“Estaldurarik gabeko tokietan lasai ederrean arrantzatzea da nire afizio handienetako bat”
Leitzan
sortua, mendizalea izango zara.
Hondartza eta itsasoa gustatzen zaizkit,
baina ni mendirik gabe larri ibiliko nintzateke. Euskaldun on bezala, mendizale
ikaragarria naiz. Ehizan, onddotan, eta arrantzan bereziki. Erreka ttikietan
ibiltzen naiz, mendiko txoko galduetan. Estaldurarik gabeko tokietan lasai
ederrean arrantzatzea da nire afizio handienetako bat.
Gustura hitz egiten du Aimar Sagastibeltzak bere herriaz, bertako
jendeaz eta inguruko mendi, erreka eta basoez. Leitzan bizi da gaur egun. Baina
gaztaroko zati handi bat eman du bertatik urrun. Futbolak Kataluniara eraman
zuen lehenengo, eta Aragoi aldera ondoren.
Tolosatik Beasainera joan nintzen. Urte ona egin
eta 2.B mailara igotzeko fasea jokatu genuen, Reusen kontra. Partida haren
ondoren, Tarragonako Nastic taldetik deitu zidaten, filialean jokatzeko. Hasieran
ez zitzaidan burutik pasa ere egin, baina udak aurrera egin ahala, arriskatzea erabaki
nuen. Urte batez probatzeko asmoz joan nintzen.
Baina Tarragonan gelditu zinen.
Lehenengo urtea ona izan zen, eta bigarrenean
Nasticen lehenengo taldera igotzeko aukera eman zidaten. Bigarren Mailan zegoen
orduan, eta ez nuen gehiegi jokatu. Asko ikasi nuen, hala ere. Hurrengo
denboraldian Teruelera joan nintzen utzita, eta hiru urte egin nituen han.
Terueletik Eibarrera. Eskertu zenuen etxera
bueltatzea?
2012/2013 denboraldia borobila izan zen Eibar taldearentzat. Athletic
Errege Kopatik kanpo uzteaz gain, Bigarren Mailara igotzea lortu zuen.
Sagastibeltzak, ordea, hamahiru partida ofizial besterik ez zituen jokatu. Ez
zuen Bigarren Mailako arantza kentzeko aukerarik izan, eta Irungo Real Union
taldearekin sinatu zuen kontratua udan.
Denboraldi hasiera polita egin genuen. Nik
uste inork ez zuela pentsatzen goian egoteko gai izango ginenik. Pixkanaka
zaleak engantxatu genituen, prentsa eta gu geu ere ilusionatzen hasi ginen.
Baina denborarekin gauzak okertu egin ziren.
Kirol emaitzak bakarrik ez. Real Unionek krisi ekonomiko eta
instituzional gogorra bizi du, eta jokalariek ondorioak pairatu dituzte. Sei
hilabete eman dituzte soldata jaso gabe. Klubeko langileen
egoera okerragoa da. Hamasei hilabeteko atzerapena daramate. Bitartean lanean
jarraitzen dute, baldintza kaskarretan hala ere. Agerraldiak eta protestak
ohiko bilakatu dira. Zuzendaritzarekiko desadostasunen ondorioz, zale askok
bizkarra eman diote taldeari.
Argi
dago denak daukala eragina. Baina niri ez zait iruditzen jokalariek hori
aitzakia modura erabil dezakegunik. Uste dut gu garela kulpable. Behin
lehenengo postuak urrun gelditu zitzaizkigunean, gehiegi erlaxatu ginen. Oso
puntu gutxi atera ditugu beheko taldeen kontra adibidez. Eta konturatu garenerako,
jaitsieraren arriskua gainean geneukan. Alde horretatik kritika handi bat
merezi dugu jokalari guztiek.
Hala
ere, soldata jaso gabe lan egitea gogorra izango zen.
Hala
izan da. Baina behintzat ekainean jasotzea bermatuta geneukan, eta horrek lasaitasuna
eman digu. Nik joan den urtean hainbat sari jaso nituen Eibarren, eta egoera
ekonomiko egonkorra izan dut. Baina egia esan, taldekide batzuek estuasun
handiak izan dituzte, eta oso gaizki pasa dute. Zorionez gure arazoa konpondu
egin da, baina larriena langileen egoera da.
Kirol elkarteen arazo
ekonomikoak ohiko bilakatu dira krisi orokorraren testuinguruan. Futboleko 2.B
maila adibide esanguratsua da. Champios Leagueko izarretatik eta ikuskizunetik
urrun, Real Unionen moduko talde historikoak gogotik sufritzen ari dira.
Desagertzearen arriskua handia da askorentzat.
“Espekulazio aluak okertu du
egoera”
Kluben
gestio txarrak izan dira egoeraren errudun. Urte oso onak egon dira ekonomikoki
estatu osoan. Diru asko mugitzen zen, eta klubek ere erraztasun handia zeukaten
dirua lortu eta nahi bezala erabiltzeko. Soldata ikaragarri altuak zeuden
adibidez. Baina, iturriak moztu ziren momentuan, ez zuten jakin egokitzen.
Hamar euro eduki eta hamahiru gastatzen ziren. Espekulazio aluak okertu du
egoera.
Nola
ikusten duzu Real Unionen etorkizuna?
Hasteko,
lehentasun osoa dauka 2.B mailan mantentzeak. Real Union talde historikoa da,
hurrengo denboraldian ehun urte beteko ditu eta edonola mantentzea lortu beharra
dugu. Momentu zaila pasatzen ari den kluba da, baina badirudi egoera
egonkortzeko oinarriak jartzen ari direla. Maila mantentzen ez badugu,
ikaragarrizko kaltea egingo digu klubari, eta gure buruari.
Kezkatuta dago Aimar
Sagastibeltza. Baina konfiantza osoa dauka taldean. Pozik dago gainera, zelaian
laguntzeko aukera daukalako orain. Soldata ez jasotzea baino okerragoa izan da aurten berarentzat partidak
harmailatik ikusi behar izana. Berdegunean hustu egiten den jokalaria da
nafarra. Teknikoki ez da bereziki abila, ezta oso azkarra ere. Baina esfortzuarekin ordezkatzen ditu bere
gabeziak. Lana da sekretu bakarra, nabarmendu
du Aimar Sagastibeltzak behin baino gehiagotan elkarrizketan zehar. Esaldiak
ondo laburtzen du bere izaera.
No hay comentarios:
Publicar un comentario