Lehiatzeko moduan dagoela erakutsi du Bidasoak

Azken minutuean ihes egin dio partidak Bolearen taldeari

ESKUBALOIA

BIDASOA IRUN 22-25 FRIGORÍFICOS MORRAZO

BIDASOA IRUN: Zubiria (4), Mujika (4), Aldunate (1), Ugarte (2), Azkue (8), Vidal (2) eta De Cerio. Urtzi (3), Cavero, D.Rincón (1), F. Rincón, Aranburu (1), Susperregi (1) eta Jauregi.

FRIGORÍFICOS MORRAZO: Peter (17), Pousada (2), Rubén Soliño (1), Suso Soliño (2), Eijo (2), Pumar eta Muratovic (2). Mile, (1), Simes (3), Amarelle (1), Cerqueira (4), Rosales (1) eta Garcia (5).

MARKAGAILUA: 2-3, 3-6, 5-6, 8-8, 9-9, 11-11 (atsedenaldia). 13-13, 15-17, 17-18, 19-21, 20-22.

EPAILEA: García Sánchez eta Rodríguez Rodríguez.

Sentipen kontrajarriak nagusitu ziren atzoko partidaren amaieran Artalekun. Puntuak pilatzen hasteko lehenengo aukera garbia galdu zuen Bidasoa-Irunek. Baina hurbil egon zen, eta bere mailako taldeen kontra partidak irabazteko ahalmena duela erakutsi zuen talde irundarrak. Lesioek baldintzatuta ere, norgehiagoka txukuna egin zuten Fernando Bolearen mutilek. Galiziarren erritmoa mantentzeko gai izan ziren, azken bost minutuetan nekeak bere agerpena egin zuen arte. Deitutako jokalari guztiek parte hartu zuten arren, beheraldi fisikoak eragina izan zuen partidaren azken txanpan.

Hasiera hobea izan zuen Cangasek. Eraginkor aritu zen erasoan eta hiru goleko aldea lortu zuen hamargarren minuturako (3-6). Hurrengo bost minutuetan partidari itxura aldatu zion Bidasoak. Azkueren bi golek eta Mujikaren beste batek, lehenengo berdinketa  jarri zuten markagailuan (6-6). Irundarren hobekuntza agerikoa zen erasoan, baina defentsan ez zuten galiziarren gol jarioa etetea lortzen. 26.minutuan lehenengo abantaila jarri zuen Aranburuk markagailuan (10-9). Hala ere, 0-2ko partzial batekin bere alde jarri zuen berriro Cangasek. Atsedenaldirako minutu erdi falta zela bi goleko tartea zabaltzeko erasoa izan zuten galiziarrek, baina Vidalek baloia lapurtu eta berdinketa lortu zuen kontraerasoan. 11-11koarekin bukatu zen lehenengo zatia.

Bigarrenean ere, joera berdina izan zen. Aldunatek sartu zuen lehenengoa Bidasoa aurretik jarriaz. Baina hortik aurrera, abantailak Cangasenak izan ziren. Markagailua berdinduta, berriro aurretik jartzeko aukera izan zuten etxekoek behin baino gehiagotan.15-15etik aurrera 0-3ko partziala lortu zuten galiziarrek eta hutsartea eskatu behar izan zuen Boleak hamargarren minutuan. Entrenatzailearen hitzek eragina izan zuen eta Ugarteren eta Azkueren golek 17-18koa jarri zuten. Hurrengo erasoan hemezortzigarrena sartzeko penaltia izan zuen Azkuek, baina atezainak jaurtiketa gelditu egin zuen. Hortik aurrera, markagailua berdintzeko aukera bakoitzean huts egin zuten irundarrek.   Defentsan gainera, atezainen ekarpena eskasa izan zen. Zubiria makal aritu zen eta Urtzik ere, ez zuen aldaketa ekarri.

Beheraldia bukaeran

Bost minutu falta zirela hutsartea eskatu zuen Boleak. 20-22ko markagailuarekin, punturen bat lotzeko aukera ikusten zuen entrenatzaileak. Hala ere, hortik aurrera jokalarien nekea agerikoa izan zen.  Irundarrak erasoan trabatu egin ziren eta galiziarren atezaina fin aritu zen gainera. Hiru goleko aldea jarri zuen berriro Cangasek eta puntuek Galizia alera ihes egin zuten. Artalekuk ezin izan dio Asobal Ligari nahi bezalako ongi etorria eman. Zaleak hala ere, pozik irten ziren kiroldegitik. Lan handia egin zuten Bidasoako jokalariek. Atzokoan ez zen garaipena lortzeko adinakoa izan, baina denboraldia luzea da eta batek baino gehiagok Artalekun belaunikatu beharko du.

diariovasco.com