Abiada hartu du Real Unionek

Laugarren partida irabazi dute segidan irundarrek 

FUTBOLA

HUESCA 0-2 REAL UNION

HUESCA: Nacho Zabal, Llamas, Escardina, Mauro (Tariq 58’), Atienza, Aicart, Piojo, Bernal (Martínez 66’), Gerard, Juanjo Camacho eta Borja Sánchez (Bruna 79’).

REAL UNION: Otermin; Piette, Sagastibeltza, Azkoiti, Valín (Rodellar 45’), Yeray González, Gabilondo, Eneko Romo (Seguín 76’), Saizar (Abaroa 63’), Juan Domínguez eta Hugo.

GOLAK: 0-1, 8’: Juan Domínguez. 0-2, 90’: Hugo.

EPAILEA: Gil Cozcoya (Valentzia).

Sasoi betean dago Real Union. Etxean bezala etxetik kanpo ere, hirunaka pilatzen ditu puntuak talde txuribeltzak. Hamabi ditu dagoeneko eta hirugarren postuan dago sailkapen nagusian, Las Palmasekin eta Conquenserekin berdinduta. El Alcoraz futbol zelaian irabazi zuten atzo irundarrek, denboraldi hasieran lidertzarako hautagai zen Huescaren kontra.

Ondo baino hobeto hasi zen partida Unionentzat. Zortzigarren minutuan txartel gorria ikusi zuen Aicartek eta falta jaurtiketan 0-1ekoa sartu zuen Juan Domínguezek. Momentu bikainean dago erdilari donostiarra ere. Hortik aurrera eroso mugitu zen Real Union, zelaian ondo kokatuta eta kontraerasoan norgehiagoka erabakitzeko asmoz. Atsedenaldiaren aurretik, Valinek min hartuta zelaia utzi behar izan zuen. Rodellar irten zen bere ordez eta Yerayk bere kokapena atzeratu zuen, zentral posturaino.

Bigarren zatian indartsu irten zen Huesca, erasoan golaren bila. Unionek bere lanean jarraitu zuen, lasai eta tinko. Kontraerasoan arrisku handia sortu zuten txuribeltzek hegaletatik. Luzapena iritsi zen horrela eta Huesca baloi luzeekin saiatzen ari zenean, 0-2koa sartu zuen Sergio Franciscoren taldeak. Gabilondoren jokaldi baten ondoren, Hugo Rodríguezek baloia sarera bidali zuen. Beste hiru puntu pilatu ditu horrela Real Unionek. Datorren asteburuan Real Sociedad Bren kontrako derbia izango dute txuribeltzek Stadium Galen.

realunionclub.com